في السياق لهاي المقالة، في كثير مواضيع ونقاشات ممكن تنطرح، التعليم، الوظيفة، الفن، لكن، راح اخصص لكل وحدة من المشكلات هاي مقالة خاصة فيها، بس مع العلم انه كلهم بصبّوا في نفس الدائرة :)) = المبادئ وتعلمها.
كتعريف للمصطلحات
قبل ما نناقش أهمية مين على مين، ولا شو لشو، بستاهل الموضوع نحط شوية تعريفات راح أمشي فيها لما أذكرها. أنا أعني بالأدوات = البرامج، برامج التصميم، وكل الأشياء اللي بتساعدنا على التصميم، اللي بنفتحها وبطلع عننا الصفحة البيضا اللي بنقدر نسوي فيها اللي بنحبه. وأعني برضو بالمبادئ = مبادئ التصميم (Design principles)، زي التباين (Contrast)، المحاذاة (Alignment)، الحركة (movement)، والخ، بالإضافة لعناصر التصميم (الخط، اللون، المساحة، الخ).
على الأقل هسا، عنا تفريق لهضول الشغلتين وبلشت تصير الأمور أوضح.
الدورات والدروس على التصميم
وحدة من إشكاليات على المحتوى العربي عن التصميم (وحتى كثير من المحتوى الغربي)، هو تركيزه كثير على أنه نتعلم illustrator، photoshop، figma، وغيرها وغيرها، اذا طلعنا مستوى أعلى شوي، بتصير الدروس: كيف تعمل هاي ال effect باستخدام ال photoshop، يمكن، بنيجي على ذكر المبادئ والعناصر بشكل عرضي، على أنها من الخيارات المتاحة لإلك (ما أظن أنني شفت درس على كيف تعمل دائرة باستخدام illustrator مثلاً 🙂).
لكن، وين المشكلة؟ هو هاض موضوع المقالة، لكن باختصار، احنا عم بنخرّج محترفين بالأدوات، شاطرين جداً أنه نعطيك تصاميم مكررة حد الملل في قالبها (بالمناسبة، كتغيير، صار معشر المصممين يضيف AI generated images 🙂)، لكن، هل يا ترى لو أعطيناهم برنامج Paint البدائي راح يعرف حدا يستخدمه في إنتاج تصميم؟
وسبحان الله، الأدوات والمبادئ بينهم علاقة عكسية في تفاعلنا احنا البشر معهم، اذا ما كننا متمكنين ومتشبعين بتعلمنا عن المبادئ وتطبيقها، لذلك:
إما الأدوات، أو المبادئ
بشكل عام، كل ما كانت الأدوات فيها شغلات أكثر، وعناصر أكثر، وأشياء جاهزة أكثر، كل ما حدّت من قابليتنا للابداع واستخدام مبادئ التصميم بشكلها الأساسي*.
لأنه المبادئ بشكل عام بتبين بأجل صورها في بساطة الأمور، لما ما يكون في تفاصيل كثيرة، لما ما تزيد العناصر وتتعقد التصاميم واللوحات فتتراكم الأفكار. وخليني أضربلك مثال بسيط على الموضوع هاض، خلينا نتخيل دائرتين بسيطات (أو ليش تتخيل، خليني أرسمها برضو)، فمباشرة بتقدر تلاحظ التباين فيها، وبتلاحظ العناصر فيها، لأنه التصميم بسيط، وبسيط جداً، بس اسمك إعلان أو ملصق، واحكيلي، وين التباين؟ (لأنك مصمم، راح تعرفه، ولكننه صدقني مش بهذا الوضوح).
*القصد = الأدوات بتعطينا قابلية أعلى للتصميم، للتشكيل، للإضافة، فبصير اعتمادنا على المبادئ، أخف بكثير من اعتمادنا على الأداة اللي موجودة.
مثال صارخ للموضوع هاض، هو أداة Canva (وأنا هون ما بنتقد الأداة، ما عندي معها مشكلة شخصية والله)، كم مرة فتحنا Canva وقعدنا نشكّل التصميم بحيث تعاملنا مع العناصر والمبادئ تطلع بتعبّر عن القصد؟ وإلا فكلنا بنفتح Canva وبنشوف "ايش أكثر تصميم مناسب للفكرة تبعتي".
كيف ممكن نختصر هاي المعضلة؟
جوابي راح يكون بشكل فردي حالياً، لأنه تغيير مجتمع مصممين كامل هاض اشي صعب جداً وفوق القدر اللي بقدر أتصور فيه الأمور حالياً، لكن، خليني أحكيلك عن شوية شغلات ممكن تعملها بشكل شخصي.
- جرب للحظة ما تستخدم إلا عناصر بسيطة، بسيطة جداً، وجرب اعمل منها تصاميمك، أولها راح تكون الأمور بدائية، وبدائية جداً، بس لاحقاً، ومع التجارب الكثيرة بتصير تقدر تلاحظ وتنتبه وين الإبداع بكون، مثلاً، تصاميم Bauhaus + ال Swiss Style.
- تعلّم أكثر عن المبادئ، في كثير كتب (ونعم، بالتصميم في كثير كتب، مش بس دورات وفيديوهات يوتيوب 😁) بتحكي عن مبادئ في جوهرها بسيط، لكن استخداماتها واسعة*
بعض الكتب والمصادر اللطيفة
هاي مجموعة كتب بتحكي عن هاي المواضيع. Interaction of Color كتاب بقدّم الألوان بطريقة مختلفة، بخليك تشوف الألوان والشغل فيها بطريقة مختلفة تماماً.
Grid systems in graphic design كتاب بحكي عن ال Grids وكيف تشكّلها وحتى تكسرها :))
The Design of Everyday Things كتاب بشرح لي الأشياء البسيطة بحياتنا تصممت بهاي الطريقة، بمبادئ بسيطة وبنكررها كل يوم، سواء بتصميم ال products او تصميم ال graphic.